مش دايمًا التمسك بيكون في صالحنا، ولا دايمًا الانسحاب بيكسرنا زي ما بنكون متخيلين، حاجات كتير فضلنا الاستمرار فيها ولو كنا أخدنا قرار وخرجنا الكارت الأحمر كنا هنكون أفضل، بس وقتها أصرينا أننا نطلع الكارت الأصفر علشان كدة وصلنا للي إحنا فيه دلوقتي ومعظمنا بيعاني.
في البداية حابب أسألك كام سؤال وهسيبك تجاوب بصوت عالي وتسمع نفسك، كام واحد فينا تعب واتوجع وقلبه اتكسر؟ كام مرة نمنا والقلب بيعاني مع اختلاف الأسباب بينا؟ كام مرة قولت لنفسك بكرة يتغيروا ويحسوا بيا ويبطلوا يوجعوا قلبي ومفيش حاجة اتغيرت؟ بالعكس كانوا بيتعبوك أكتر زي ما يكونوا قاصدين يدمروك، والغريب إنك لسه مستني منهم يتغيروا مع أنك عارف ومتأكد إن مفيش حاجة هتتغير، ولو في حاجة هتتغير هتبقى انت، وطبعًا مش محتاجني أقولك إن تغيرك هيكون للأسوأ.خليك مجهز الكارت الأحمر لغاية لما تعرف هتخرجه لمين ولإيه، وما تتفاجئش لأنه احتمال يكون في طريقه ليك وتكون انت اللي تستحقه وفي أشخاص تانية مجهزينه ليك، في الوقت ده انت محتاج تلحق نفسك لأنك زي ما بتعاني من الناس ممكن تكون بيتعاني منك.