انت مش شبه حد، ولا حياتك وظروفك هي هي نفس حياة اللي حواليك، مافيش صح وغلط، فيه حياة مليانة بالاختيارات -اللي أهم حاجة ما تكونش بتغضب ربنا- كل اللي انت محتاجه إنك تشد الفيشة من دماغك وتفصل عن كل اللي حواليك وتعرف انت مين، قدراتك إيه وعايز إيه، مش شرط تكون زي أحمد اللي عمل مشروع كسر الدنيا، عادى انت ممكن تكون محمد الموظف اللي يومه روتيني وبيرجع يترمي في حضن ولاده وبيته، وممكن تطور مهاراتك وتزود من قدراتك وعلمك ومعرفتك من غير ما تخاطر بكل حاجة في إيدك عشان بس الناس تشوفك ناجح، لأن كده كده الناس هتشوفك بعينها مش بعين الحقيقة.و الكلام لكل حد بيقرأ كلامي، اعملوا اللي انتم عاوزينه مش اللي ناس بتفرضه عليكم وبتشكل حياتكم في قوالب ضيقة ومقفولة على شكل نصيحة ممكن تنزلك سابع أرض لو مش ملائمة ليك ولا لظروفك. اعمل الصح بتاعك مش بتاع الناس وشد فيشة دماغك من أي حاجة مش ملائمة ليك.