فوضى ومطبات صناعية، صناعة أهلية تمرجح تشخلع عمودك الفقري، والفقري فقري يتنطط علي أرض بحور، أصل البلاعة غطاها مفقود، والمفقود في الشارع مخنوق، من زحمه أتوبيس ملحوم، ملحوم بناس مفرومة في حزمة بصل مخزونة، ويعيني علي الزحمة تعطل أجدعها ميعاد فيها يوصل بعد الميعاد بميعاد، وتتفاجأ بإيد ممدودة من ناس حشرية ومتلومة، وبفوطة صفرا تلطخ إزازك، وده يمشي عكس عكاس وده واقف يركب ناس وده واقف يبيع سجاير علي كوبري سريع رهوان، هنا بلاعة لصيد إنسان، يستحمي ويغوص كمان، قرب هنا زبالة مرصوصة ألوان، فيها يعشش ناموس ودبان، وعندنا الماية مقطوعة وجرادل منقولة، منقولة علي الإكتاف ماهي ياما شالت أولاد، وهي رايحة الماية ليهم عشان يقدروا يعيشوا، والتوكتوك عندنا مفكوك يجري بلا مربوط وتضيع أرواح بريئة، ويقوم صوان عليها.. والساقية ماشية دايرة بتحصد الحكاوي وهي دُنيا علينا قاسية صابرين علي العجايب.