فكرة الخَلوَة بالنسبة للشقيري كان ليها بعض الأهداف المهمة:
1- يتخلص من العادات السيئة.
2- يوصل لفكرة السلام الداخلي، اللي الشقيري بيقول عليها إنها موجودة في القرآن بإسم النفس المطمئنة.
3- يقيم الماضي ويخطط للمستقبل خصوصًا بعض ما وقف برنامج خواطر.
4- يرجع لعادة القراءة، خصوصًا إن القراءة عنده قلت بشكل كبير مع إنشغاله في مجال الإعلام.
اختيار الشقيري لأربعين يوم بالتحديد كان اجتهاد شخصي من بعد ما شاف إن الرقم ده بيتكرر أكتر من مرة سواء في التاريخ أو في القرآن أو في الحديث، وبعد ما وصل الشقيري لسن الأربعين قرر إنه يشارك أهم الخواطر اللي كتبها خلال فترة الأربعين يوم، شارك خواطر متفرقة سواء عن حياته أو المشاكل النفسية اللي بيمُر بيها أو عن القرآن أو عن التحسينات اللي قام بيها أو الكتب اللي قراها.
الملخص ده مقسم لأربع أجزاء رئيسية هنحاول نتكلم فيهم عن أهم الخواطر اللي اتكلم عليها الشقيري في الكتاب بتاعه، بس طبعًا مش هنقدر نغطي كل أفكار الكتاب ف لو إنت حابب تستفيد أكتر تقدر تقرأ الكتاب نفسه. (هسيبلك لينك الكتاب ف اول كومنت)
الجزء الأول: مواقف مهمة
الشهرة من الحاجات اللي معظم الناس بتفكر فيها ونفسها تكون مشهورة ولكن، هل فعلًا الشهرة حاجة كويسة؟
الشقيري بيقول إن في مواقف كتيرة جدًا حصلت في حياته ساعدته يكشف إزاي الشهرة دي خادعة.
على سبيل المثال، الشقيري كل ما يقابل واحد مشهور سواء داعية أو مفكر كان بيشوف دايمًا فيه عيب فمثلا بيلاقي الناس اللي بيتأخروا على مواعيدهم أو الناس الماديين أو العصبيين، كل واحد من الناس المشهورين دول بيلاقي فيه حاجة بتدايئه وعلى الجانب التاني كان بيضايق جدًا من فكرة إزاي الناس بتحكم عليه لإنه شخص مشهور، فعلى سبيل المثال واحد مرة جاله في المطار وقاله إزاي إنت قاعد مش مبتسم إزاي إنت بتقولنا في الفيديوهات إبتسموا وإن الإبتسام ده من السُنه وإنت مش مبتسم وقاعد متدايئ.
طبعا في أسباب كتيرة جدًا ممكن تبرر ليه الشقيري كان متضايق في اللحظة دي.
مهما حاول واحد زي الشقيري أو أي واحد من المشهورين إن يبرر لنفسه الأخطاء بتاعته الناس دايمًا هتفضل تفتكر كل خطأ ولو بسيط جدًا مش هترحموا، وبالتالي الناس لازم دايما تفهم إن الشهرة دي خادعة ومزيفة والناس لازم تفهم أد إيه الشهرة دي ليها عيوب كتير زي ما ليها مميزات كتير.
الموقف التاني اللي هنتكلم عنه هو موقف مهم حصل مع أهله بعد حلقة عملها الشقيري في خواطر11 عن فكرة الأكل الصحي.
في يوم من أيام رمضان وعلى الفطار قرر إنه يستبدل السمبوسك المقلي بـ سمبوسك معمولة بطريقة صحية لكن أهله للأسف محبوش أبدًا فكرة السمبوسك اللي معمولة بالطريقة الصحية وشافوا إن الشقيري بيحاول يفرض رأيه عليهم وبالرغم إن الموضوع بسيط جدًا ولكن الشقيري شاف إن في الموضوع ده فكرة مهمة جدًا وهي ",إنن صعب إنك تغير عادات أقرب الناس ليك فما بالك إنك تغير عادات مجتمع بحاله",.
فمثلًا لو إنت عايز تعمل فيديو على يوتيوب أو تنشر وعي لموضوع معين، الموضوع فعلا بياخد وقت كبير جدًا علشان تقدر تغير من سلوك المجتمع كله.
الجزء الثاني: خواطر نفسية
الدماغ بينقسم لـ3 أجزاء هم:
1- دماغ الزواحف - Reptilian Brain
الجزء ده هو المسئول عن الأكل والشرب والجنس، الشقيري بيسميه شهوان.
2- دماغ الثدييات - Mammalian Brain
الجزء ده هو المسئول عن المشاعر زي (الخوف - القلق - الحاجة لاحترام - حب الشهرة - السيطرة)، الجزء ده الشقيري بيسميه عطفان.
3- الدماغ المفكر- Frontal Lobe
هو الجزء المسئول عن التفكير و التخطيط والتحليل، الجزء ده الشقيري بيسميه عقلان.
الشخص الناجح هو الشخص اللي يقدر يخلي عقلان يسيطر على شهوان وعطفان وبالتالي الدماغ دايمًا في حالة حرب كل واحد فيهم بيحاول يسيطر على التاني، وعلشان تقدر تسيطر على نفسك يبقى لازم تخلي عقلان هو اللي ماسك زمام الأمور وعلشان تعمل كده في ٦ حاجات الشقيري بيسميهم أسلحة العقل.
السلاح الأول: العلم
الشقيري بينصح بأربع حاجات تعملهم:
1- إنك تقرأ 3 كتب عن المشكلة اللي عايز تحلها.
2- إنك تحضر دورة.
3- إنك تحضر محاضرة على اليوتيوب عن الموضوع اللي عايز تحله.
4- إنك تسأل خبير في المجال اللي انت عايز تحل فيه المشكلة بتاعتك.
السلاح الثاني: الهدنة
كل واحد فينا عنده عادة أو أتنين على الأقل عادات موجودة فيه ومش عارف إنه يتخلص منها، منهم فكرة الهدنة وهي إنك تقطع فيها كل المؤثرات الخارجية اللي ممكن تخليك ترجع للعادات السيئة والفكرة هنا إنك تطبق فكرة الخَلوَة.
الشقيري مش قصده هنا إنك تنقطع عن العالم وتسيب الناس ولكن قصده إنك تاخد هدنة علشان تقدر تفكر وترجع بشكل أحسن،
الشقيري بيقترح إنك تاخد فترة أربعين يوم من الخَلوَة ممكن تزيد او تقل حسب الأجازات اللي عندك فلو إنت مثلا طالب عندك وقت اكتر ممكن تاخد أجازتك السنوية في انك تقدر تستغل الفترة دي في انك تاخد خلوة او تقدر تغير من عاداتك السيئة لو انت بتشتغل تقدر تظبط اجازاتك من قبلها وتحاول تخطط للموضوع بحيث إنك تقدر فعلًا تغير من نفسك في الفترة دي.
الشقيري بيقول إن فكرة الخلوة ممكن تكون صعبة على بعض الناس ولكن بيقول إنها في نفس الوقت مهمة جدًا وتستاهل إنك تضحي بالوقت ده علشان فعلًا تقدر تغير نفسك على مدى السنين اللي جايه.
السلاح الثالث: التفاوض
في خمس مشكلات نفسية تسمى بـ التشوه المعرفي - Cognitive Disto r tion
1- مشكلة التعميم
يعني مثلًا يكون عندك مشكلة في حياتك زي مشكلة في شغلك وتاخد المشكلة دي، وتخليها تأثر على باقي مجالات حياتك زي علاقتك مع صحابك أو علاقتك مع أهلك.
2- مشكلة التضخيم
انك تكبر المشكلة وتديها أكبر من حقها.
3- مشكلة التشخيص
إنك تخلي كل مشكلة كإنها مشكلة شخصية، إنت ممكن يكون واحد بيتعامل معاك بشكل عادي ولكنك تعتبر إن المشكلة دي مشكلة شخصية وإن هو بيهاجمك بشكل شخصي.
4- مشكلة التطويل
هي إعتقادك إن كل مشكلة هتفضل مطولة، وعمرها ما هتنتهي.
5- مشكلة التعتيم
هي إنك تشوف كل حاجة بتحصل معاك بنظرة سوداوية، حاول إنك تحط الأمور بالشكل الصح.
الشقيري بيقترح انك تقرأ كتاب اسمه Don't Sweat The Small Stuff a nd It's All Small Stuff الكتاب ده بيساعدك انك تفهم أكتر عن الموضوع ده.
السلاح الرابع: التعامل مع الآلام النفسية
الآلام النفسية اللي الشقيري بيلخصها في كلمة Blast هي:
Bo r ed الشعور بالملل
Lonely الشعور بالوحدة
Angry الشعور بالغضب
Stressed الشعور بالقلق
Tired الشعور بالتعب
كل دي حاجات بيمُر بيها كل إنسان والشقيري بيقترح بعض الحاجات البسيطة اللي ممكن تعملها وتساعدك تتغلب على الآلام دي
زي مثلا:
إنك تاخد نص ساعة مشي بره البيت أو إنك تمارس هواية إنت بتحبها أو إنك تعمل أعمال منزلية مش محتاجة تفكير وبتاخد مثلا عشر دقايق او ربع ساعة أو إنك تخرج مع صاحبك اللي بترتاح معاه نفسيًا، كل دي حاجات الشقيري بينصح بيها وبيقترح كمان إنك ماتقعدش على اليوتيوب تتفرج على فيديوهات تافهة علشان تطلع الآلام النفسية اللي عندك لإن الفيديوهات دي إنت فاكر إنها بتساعدك وبتخليك تتخلص من الألم وتطلع اللي جواك ولكن في الحقيقة الفيديوهات دي بتاخد من طاقتك.
.
السلاح الخامس: الدعاء
إنك تدعي ربنا إنه يعينك على الحاجات اللي اتكلمنا عليه،ا وإنك تطبق أسلحة العقل علشان في الآخر توصل إن عقلان يتغلب على شهوان و عطفان.
السلاح السادس: هو الصوم
الصوم بيساعد جدًا على تقليل الشهوة، الشقيري بينصح بإنك تحاول تصوم شهرين متتاليين وبينصح إنك تتفرج على حلقة الصوم بريء من برنامج خواطر علشان تعرف إزاي تقدر تطبق فكرة الصوم في حياتك.
الجزء الثالث: تحسينات الشقيري
في الجزء ده الشقيري بيتكلم عن بعض التحسينات اللي هو قام بيها في حياته، واللي بينصح الناس إنها تقوم بيها علشان تقدر تطور من نفسها.
أول تحسين هو الصوم
بالنسبة للشقيري كان من الحاجات اللي اتعلمها مع الوقت واللي قدر يحسن نفسه فيها هي الصوم، وبينصح إنك تحاول تلتزم بإنك تصوم إتنين وخميس أو إنك تصوم يوم ويوم وتشوف هيحصل إيه معاك.
ثاني تحسين هو تطبيق Day One
التطبيق ده بينصح بيه الشقيري، وده ممكن تسجل فيه كل مذكراتك وتحط كمان فيها أي صور، التطبيق ده مهم جدًا لو إنت بتحب تسجل كل لحظاتك ولو إنت بتحب تكتب مذكراتك فالتطبيق ده هيديلك خيار انك تطبع كل الكلام اللي انت كتبته في كتاب مطبوع.
ثالث تحسين هو فكرة الخلوة
الخلوة هنا إنت ممكن تطبقها زي ما الشقيري طبقها، ولكن لو إنت مش قادر تطبقها لمدة أربعين يوم تقدر تطبقها لمدة يوم أو لمدة أسبوع، المهم إنك تحاول تعتزل الناس وتخلي نفسك قاعد بدون إنترنت، وبدون موبايل وتحاول تحلل حياتك وتخطط لمستقبلك.
رابع تحسين هو فكرة إنك تحدد أهم خمس أصحاب
حاول تكتب في ورقة وقلم أهم خمس أصحاب عندك وتشوف هل إنت فعلًا راضِ عنهم؟ وهل إنت فعلًا مبسوط بالعلاقات دي ولا لاء؟ وافتكر دايمًا إن الصاحب ساحب.
خامس تحسين هو فكرة القراءة
القراءة اليومية لمدة نص ساعة الشقيري دايمًا كان بيحط لنفسه جزء معين خلال اليوم، الجزء ده مخصص للقراءة بس.
أما التحسين السادس والأخير فهو فكرة الوصية
الفكرة دي بيقول فيها الشقيري إنك لازم تقعد مع نفسك وتحاول تكتب فحوالي 3 ساعات وصيتك وتسلم نسختين لأقرب الناس ليك، تحاول تكتب فيها طلبات معينة لما تيجي تموت زي مثلا ( مين هيغسلك - مين هيصلي عليك - دعاء انت حابب الناس تدعو بيه ليك - المكان اللي انت عايز تدفن فيه - الجزء اللي هيروح من ثروتك بعد ما تموت للوقف الخيري - وتكتب إنت حابب إزاي الناس يتصرفوا في حساباتك اللي على السوشيال ميديا بعد ما تموت - واخيرا تكتب رسايل لأقرب الناس ليك)