مٌقدِّمة الكتاب
مادام قررت تبدأ قراءة الكتاب ده، يبقى أنت أكيد حد مُهتم بالتعلُّم المستمر والتطوير من نفسك عشان أول ما تيجي الفرص المناسبة تبقى مستعد لاقتناصها. أحييك على الروح دي وأبشّرك إنك جيت للمكان الصح إللي هيتوِّج كل سعيك للتميُّز باللمسات الفنية الأساسية، مش بيقولوا أهم من الشغل تظبيط الشغل؟! أهو احنا هنا بقى هدفنا تظبيط الشغل.

اسم الكتاب من الألف للباء لإن مجال التسويق الشخصي ده كبير أوي، مش هقدر أمشي معاك من الألف للياء، لكن خلينا ناخد الجزء الأول مع بعض ونتحرّك من الألف للباء. هدف الكتاب هو مساعدة أي حد محترف في مجاله في إنه يوصل لفرص أفضل وعملاء أكتر، تبقى نار على علم في مجالك، تكون أول حد الناس تفكَّر فيه لما يحتاجوا المنتج أو الخدمة إللى أنت بتقدّمها.