الرئيسية

/ روبرت غرين

/

/ فن الإغواء

المصدر : مجتهد

الملخص

مبدأيا لا يا جماعة انا لست مع تشجيع الاحتيال والاستغلال والانتهازية اللي ممكن يكون مربوط عندنا بكلمة اغواء , بتكلم بضمير المخاطب بس علشان الموضوع يبقى مثير مش اكثر لكن ممكن تستخدم بعض المبادئ في ظروف معينة في حياتك على الاقل تبقى عارفهم عشان لو اتطبقت عليك , متبقاش عايش في عالم مثالي.
ايه هو الاغواء ؟ هو شكل من اشكال القوة هدفه السيطرة سيطرة الرجل ع الست او الست علي الراجل الفرد ع الفرد بصورة عامة وكمان سيطرة السياسي والتجاري على المجموعة والشعب. انا في الملخص اغلب كلامي هيبقى للمذكر بس المبادئ اللي هتتقال ممكن استخدمها عادي مع كل حالة من الحالات دي.
هدف الإغواء
الجزء الأول من ملخص كتاب فن الإغواء , هقرب بأسلوب غير مباشر انا عايز ايه من اغوائك ؟ عاوز اؤثر عليك ادفعك احركك في اتجاه معين بهدف مصلحه، بس انت لو حسيت ان أنا هاثر عليك انت كده هاتضايق محدش بيحب يحس انه بيطيع حد او ان احدهم بيتحكم فيه عشان كدا لازم تعمل زي الاسد اللي عشان يصطاد الغزال بيعمل ايه ؟ بيخبي نواياه بيستخبى هو نفسه ويهيء للغزال البيئة انها تقرب وتطمن له وتروح تشرب من النهر بدون ان تحترس منه ، نفس الفكرة برضه لازم انك تخبي الاغواء في سلوكك وتقرب باسلوب غير مباشر و إلا هتثير الشكوك حواليك لو ظهرت في تصرفك مثلا اهتمام زايد من البداية دا على الاغلب هايتقابل بالارتيابك و الاحساس بالخطر.

الصحيح انك تلتزم بعلاقة حيادية من الاول وما تحسس الطرف الثاني بهدفك , تقدم كصديق وليس كحبيب وده فكل المجالات ما تديش الانطباع انك بتحتال للحصول على شيء ،في السياسة مثلا الطموح العلني بيخوف لكن انت لو عملت ساذج مفيش منك اي تهديد ده هيحسس منافسينك واعداءك بالامان وهيبقى معاك مجال كبير للمناورة وعلى بال ما ينتبهوا لنواياك الحقيقية يكون الوقت فات.
ابعت اشارات متضاربة ومختلطة
الجزء الثاني من ملخص كتاب فن الإغواء , الاغواء عامل زي السحر ناس كثير فاكره ان اقوى سلاح في شنطة الساحر هو التمييز سواء كان تميز في الشكل ،الجمال مثلا ،او حتى التميز بصورة عامة في اي مجال بس السحر القائم على المقومات ده مهدد لان فيه شبه الساحر ممكن يحل محله كما يتطلب وجود الساحر بصورة جسدية على طول عشان يظل مسيطر على الناس لكن الاغواء الحقيقي سلاحه مش في التميز ولا الجمال هو مجرد لعبة نفسية بيخلي الساحر مسيطر فوجوده زي الحالة اللي فاتت وفي حالة غيابه هو حاضر برضه ذهنيا في عقل الناس بيعمل كدا ازاي ؟

انه يكون صعب بمعنى صعب على التصور في الفهم،ابعت اشارات متضاربةرسائل مفاجأة متعاكسة مختلطة خليك برئ ووقح في نفس الوقت ذكي وساخر و شيطاني وخجول عفوي وحزين كل دول في نفس الوقت ،من الحاجات اللي خلت غاندي اثر على الجماهير بقوة انه مش بس كان بيظهر الجانب الطيب بتاعه لو عمل كده كان الناس ممكن يتهموه بالنفاق في سرهم لكن هو بجانب سلميتة اعترف علنيا بالشعور بالغضب وحب الانتقام , التضاد ده اثر جدا علي الجمهور، عندك مثلا لوحة الموناليزا فكرة وجود العنصرين المختلفين في ابتسامتها هو اللي اداها الجاذبية بتاعتها التضاد دايما بيخلق الحيرة والحيرةبتبهر و تفتن بتعمل هاله حواليك الهالة دي المغناطيس بتجذب الناس.
اظهر كشخص مرغوب
الجزء الثالث من ملخص كتاب فن الإغواء , ايه اللي يخلي الدول مهتمة بكاس العالم هل عشان قيمة الذهب اللي فيه الجائزة المالية بس يعني .لا اكثر حاجه مهمه بشأنه هو اهميته الاجتماعية،الاهمية الاجتماعية دي جاتله منين ؛من التنافس فكرة ان عندك 100 واحد بيتنافسوا على جايزة واحدة .حتى وجود المنافسين بيخلق قيمة اضافية جنب قيمة الجائزة نفسها انا لو كسبت هبقى كسبت قيمة الجائزة زائد اني انتصرت على مائة واحد دا شيء هايحسسني بالتميز ويرفع قيمة الجائزة احنا مخلوقات اجتماعية و بنتأثر بشكل هائل بأذواق الناس ورغباتهم عشان كدا مهم انك تظهر كشخص مرغوب تعمد انك تبين الحوادث اللي بتدل على انك مرغوب، او حتى فبركها ده هيثير التنافس عليك ويرفع قيمتك.
اخلق حاجة
الجزء الرابع من ملخص كتاب فن الإغواء , الناس كل الناس جواها فراغ ،فراغ ما وحاسين انه في شيء ناقص جواهم بس هما بيتدفنوا الافكار دي كويس ويردموا عليها بالرمل لو عرفت تحفر و تطلع الشكوك اللي جواهم دي ع السطح هيبقى سهل جدا اغوائهم والتحكم فيهم خليهم يحسوا ان حياتهم مملة و ان اصدقاءهم اقل امتاعا , ثير فيهم مشاعر عدم السعادة حيال ظروفهم وحيال انفسهم ؛ كدا انت خلقت الحاجة هنا بقى تطرح نفسك كحلال هيغطي الاحتياج اللي نقصه ده .

انت اللي جاي من بره بتمثل التغيير والاختلاف وكسر الروتين ،كنت شفت فيلم من فترة واحد عرف يسيطر على البطلة،انه في الاول ركز على انه يوصل لها ان حياتها مملة مملة بشكل مرعب خلق جواها حاجة شاور لها علي الملل اللي ف حياتها و كبروا جدا مع انها مكانتش شايفاه في الاول وهو بقى ظهر على العكس من كل ده كلامه افعاله كلها تشويق واثارة كده هي شفته على انه يخلصها وهو الحل، نفس المبدأ ده السياسيين بيطبقوه عالشعوب لو عايزين يدفعوهم للثورة مثلا عشان يسيطروا عليهم بيخلقوا جواهم حاجة الاول بيحسسوهم بالسخط على حاضرهم و ازاي هما كانوا عظماء زمان مثلا لكن دلوقتي لا
اخلق الاغراء

الجزء الخامس من ملخص كتاب فن الإغواء , إقرأ الناس ، الناس عبارة عن رسائل ،رسايل ماشيه ع الارض في لبسهم في كلامهم في سلوكهم كل دي رسايل ولو دققت هتلاقي تحت السطور بتاعتها مكامن لأمال مستخبية الاجزاء دي هي نقطة الضعف بتاعتهم لو استخدمتها تعرف تخلق اغراء مثالي متفصل بالمللي على مقاسهم،فيهم اللي مش حاسس بالامان تجاه شكله،تجاه اصله تجاه ممتلكاته ،تجاه قوته ورجولته ، انت حاول تستشف النقط دي و استخدمها ركز عليها ادعمهم فيها ،امدحهم بشأنها هتبقى تقريبا ملكتهم.
خليهم في حالة ترقب ما
الجزء السادس من ملخص كتاب فن الإغواء , عارفين القصة بتاعة شهريار اللي كان كل يوم بيقتل واحدة جديدة لحد م شهرزاد جاءت وعرفت تهرب من المصير دا بأنها حكيت له حكاية مرضيتش تكملها الا تاني يوم و أحداثتاني يوم مكميلتش الا تالت يوم وهكذا عرفت تسيطر على الملك بالترقب والتشويق الناس بيحبوا كل ما هو غامض وده مفتاح من مفاتيح استدراجهم نحو الشبكة بتاعتك اتصرف بطريقة تخليهم يتساءلوا ايه اخر مستجداتك كل شويهاعمل حاجة مش متوقعه ده هيخلق شعور بالعفوية وزي ما حصل مع الملك ،طول ما انت قادر تخليهم مش قادرين يعرفواايه اللي هيحصل بعد كدا هيكونوا تحت سيطرتك وتكون انت المتحكم لكن عارف لو دخل على الطبخه شوية روتين او اعتياد وبقت تصرفاتك متوقعه؛الطبخه هتبوظ و اللي كان بياكلها اما يرفضها و اما هياكولها ومش حاسس بطعمها.
اعزل الضحية
الجزء السابع من ملخص كتاب فن الإغواء , كان في راجل شرير زمان بيخطف الاطفال ويبعهم كان بيعمل كده ازاي ؟
كان بيمشي بزماره ف وسط البلاد ف العيال بيفضلوا ماشيين وراه العيال مستمتعين بالنغمة بتاعت الزماره وما بيخدوش بالهم بأنهم بعدوا بعيد جدا عن ابوهم وأمهم وبيتهم وبعدما بيتأكد هو خلاص عزلهم ولو صرخوا ما حدش هيسمعهم هنا بقى الحرامي بيلفو يخطفهم بمنتهى السهولة. عزل الضحية مهم جدا في عملية الاغواء دا مثلا الهدف الهدف بيبقى في الطبيعي وزنه عشره كيلو بس انت لو جيت تحركه هتلاقي وزنه مائة كيلو ليه كدة ؟

لأنه متصل بشبكات الامان فيه سلاسل بينه و بين اهله وبينه وبين اصحابه و بينه وبين روتينه اليومي كل دول هايضيفوا له وزن ويصعبوا عليك المهمة ،هيخلوه منيع من الجر،انتبقه مهم منك تقطع السلاسل دي الاول ابعد الضحية نفسيا عن اهله ،واصحابه ،وحياته اليومية اقنعه بطريقة غير مباشرة ان اصحابه مملين واهله مكتفينه ويمارسوا عليه الاستبداد ،ادعيه للتمرد والثورة عليهم ومجرد ما السلاسل اللي بينه وبينهم تتفكك هنا بقى معزول وضعيف وبقا سهل عليك السيطرة عليه.
ادمج المتعة مع الالم
الجزء الثامن من ملخص كتاب فن الإغواء , من اكبر الاخطاء اللي ممكن تقع فيها هي انك تتصرف على طول بلطف ،انت خايف من زعل الطرف الثاني فتتحول شخص لطيف وفي نفس الوقت رتيب وممل بس الحياة عاملة زي الملاهي ما حدش بيحب يروح ملاهي العابها كلها على الارض كلما كانت الالعاب اللي فيها خطيرة اكثر كلما كانت احسن وكلما كانت المتع اللي بتيجي من وراها اكثر؛ عشان كدا لحظات الالم ،الخوف ،الحزن ،مهمة جدا ولازم تستغل اي حدث بيسببهم،وما تحاولش تحله بسرعة ،ثير الغيرة في الطرف الاخر ؛وتره بيها وخليه يحس بالالم وحتى لو ما حصلش حاجة تستدعي التوتر ده حاول تخلقه انتا خلق التوتر عشان تشيلوه،اخلق المشاكل عشان تحلها،المعتاق بعد الالم طعمه حلو جدا ،وهايضيف كثير دا غير كمان انك بالطريقة دي بتمنع الملل.